Oíche Cultúir

• Naisc ábhartha eile
• Cláir - Ealaíona & Míchumas
• Cláir - Na hEalaíona & Oideachas , Ealaíon Óige
• Cláir - Déanta I nGaillimh
• Bealtaine
• Oíche Cultúir
• Forbairt Ghairmiúil d'Ealaíontóirí Radharcacha
• Ceardlann Scoileanna Ildánacha

Contae na Gaillimhe chun Oíche Chultúir 2024 a Cheiliúradh le níos mó ná 40 Imeacht Iontach

Ar an Aoine, an 20 Meán Fómhair, tiocfaidh beocht i gContae na Gaillimhe le cruthaitheacht agus cultúr, ag cur fáilte roimh chách taitneamh a bhaint as imeachtaí cultúrtha saor in aisce agus éagsúla a bheidh ar siúl ar fud an chontae don Oíche Chultúir. Beidh níos mó ná 40 imeacht ar chlár Oíche Chultúir Chomhairle Chontae na Gaillimhe, lena n-áirítear ceol, damhsa, amharclannaíocht, ealaín, filíocht, puipéadóireacht, scéalaíocht, taispeáintí scannán, ceardaíocht agus go leor eile.

Ina 19ú bliain, ceiliúradh speisialta náisiúnta ar chultúr, ar chruthaitheacht agus ar na healaíona in Éirinn atá i gceist le hOíche Chultúir. A bhuí le tacaíocht ó Oifig Ealaíon Chomhairle Chontae na Gaillimhe agus ón gComhairle Ealaíon, beidh gach imeacht saoir in aisce. Is é aidhm na hOíche Cultúir ná pobail a thabhairt le chéile i gceiliúradh comhroinnte ar an mbeocht agus ar an éagsúlacht atá mar bhonn faoi thírdhreach cultúrtha na Gaillimhe.

“Is cinnte gur ‘Oíche do Chách” í Oíche Chultúir, a deir Sharon O’Grady, Oifigeach Ealaíon Chontae na Gaillimhe. “Léiríonn an clár spiorad bríomhar cruthaitheach ár bpobail le raon leathan eispéireas cultúrtha a oireann do gach aoisghrúpa agus do spéis gach duine.”

Beidh imeachtaí ag tarlú i rith an lae agus go déanach sa tráthnóna sna háiteanna seo a leanas: Baile Átha an Rí, Béal Átha na Sluaighe, Baile An Doirín, Béal Átha Ghártha, Baile Chláir, Conamara, An Clochán, An Gort, Áth Cinn, Cill Chonla, Cinn Mhara, An Droichead Nua, Órán Mór, Port Omna, Rinn Mhaoile, Ros an Mhíl, Tuaim, An Ghráig, agus Oileáin Árann – Inis Mór, Inis Oírr agus Inis Meáin.

I mbliana, is é buaicphointe chlár Chomhairle Chontae na Gaillimhe ná Lumina, sraith teilgean ealaíonta faoin aer ar Ard-Eaglais Deastógála na Maighdine Beannaithe Muire, ar a dtugtar Ard-Eaglais Thuama CR. Léirithe ag Culture Works, beidh Lumina ar siúl ó 9:30pm mar chuid den Oíche Chultúir Dhéanach. Cuirfidh an taispeántas oíche iontach seo an lucht féachana faoi dhraíocht agus aghaidh Ardeaglais Thuama á athrú ina canbhás solais agus fuaime trí theilgean agus beo-léirithe córúla. 

I measc bhuaicphointí eile an chláir tá:

Sa Mhám, cuirfidh Comharghrúpa Ceoltóirí Gliogar ceolchoirm i láthair ag seoladh an tsuiteáin Fáistineach ina mbeidh páirt á glacadh ag na ceoltóirí Eoghan Ó Ceannabháin, Ultan O’Brien agus Saileog Ní Cheannabháin.

Is eispéireas spraíúil, tumthach é The Enchanted ar Inis Mór. Tabharfaidh an draíodóir (Ali Keohane) an lucht féachana go Hy-Brasil, an t-oileán miotasach a imíonn as radharc trí scéalta a bheidh á n-insint ag aisteoirí Mikel Murfi, Jenni Nikinmaa agus Tonya Lenhart. Beidh dhá thaispeántas ag 5pm agus 7pm.

Is imeacht cultúrtha bríomhar é The Siar Harvest Session a dhéanann ceiliúradh ar thraidisiúin shaibhre cheol agus ealaín na hÉireann i dtírdhreach álainn fómhair Ché Chinn Mhara agus ag cur fáilte roimh an séasúr nua, ag déanamh ceiliúradh ar chultúr na hÉireann agus cumhacht aontaithe an cheoil agus na healaíne. 

Is imeacht físiúil agus taibhealaíona é Soundwaves... Seen and Heard! atá ceangailte le sraith fuaimthonnta na dtaibh-ealaíona ar Fheirm Shóisialta An Trian Láir i rith 2024. Is féidir le cuairteoirí taitneamh a bhaint as fuaimeanna gutha roinnt amhrán mór le rá ó chóir áitiúla agus iad ag spaisteoireacht thart ar an teachín feirme, an teach gloine agus an taispeántas gairdín.

Meascán cliste é Monsters and Things i Leabharlann Bhéal Átha na Sluaighe de scigdhráma geamaireachta, puipéadóireacht agus scéalaíocht atá dírithe ar shamhlaíocht na ngasúr a ghríosú. Tá meascán álainn bosca puipéadóireachta seanfhaiseanta i stíl Punch agus Judy agus puipéadóireacht slata sheanfhaiseanta fite fuaite le scéal nua-aimseartha faoi chlú agus saibhreas an ‘X-Factor’. 

Tá tairiscintí fíorúla ann dóibh siúd ar fearr leo sult a bhaint as Oíche Chultúir ón mbaile. Ina measc seo tá taispeántas ar líne Chlub Grianghrafadóireachta Solas a thaispeánann grianghrafadóireacht a bhfuil duaiseanna buaite aici agus The Write-On Literary Kaleidoscope, turas fíorúil dhá uair an chloig d’fhilíocht, scéalta agus amhráin arna óstáil ag Grúpa Scríbhneoireachta na Gaillimhe Write-On.

Cibé má tá spéis sna healaíona agat nó más taiscéalaí nua tú, cuireann Oíche Chultúir clár dinimiciúil ar fáil do chách, ag fí taipéise de scéalta, buanna agus traidisiúin éagsúla. Bígí linn don cheiliúradh náisiúnta seo ar an Aoine, an 20 Meán Fómhair agus bígí linn le háilleacht agus cumhacht na hOíche Cultúir agus muid ag ceiliúradh agus ag nascadh Oíche do Chách.

Le sonraí iomlána agus an t-eolas is déanaí maidir leis na himeachtaí a fháil, tabhair cuairt ar CultureNight.ie agus lean Oíche Chultúir Chontae na Gaillimhe ar na meáin shóisialta.

Tacaíonn an Chomhairle Ealaíon agus Comhairle Chontae na Gaillimhe go bródúil le hOíche Chultúir / Culture Night.

Clár Digiteach Oíche Chultúír‌