Athrú Aeráide

Plean Gníomhaithe ar son na hAeráide 2024-2029 Chomhairle Chontae na Gaillimhe

Ghlac ár gcomhaltaí tofa le Plean Gníomhaithe ar son na hAeráide 2024-2029 Chomhairle Chontae na Gaillimhe ar an 19 Feabhra 2024. Forbraíodh an straitéis cúig bliana i ndiaidh comhairliúcháin fhorleathain ar fud an Chontae le daoine óga, grúpaí pobail, gnólachtaí áitiúla, ionadaithe tofa, baill foirne agus comhlachtaí poiblí eile.

I measc na bpríomhchuspóirí atá leagtha amach sa Phlean, tá tacú le tionscadail fuinnimh in-athnuaite a fhorbairt, geilleagar ciorclach a chur chun cinn agus astaíochtaí carbóin a laghdú.

Cuireann an Plean treochlár ar fáil chun dul in oiriúint do ghuaiseacha aimsire, amhail tuilte cósta, abhann agus uisce dromchla, creimeadh cósta, tonnta teasa agus triomach, agus meastar go méadóidh minicíocht agus déine na nguaiseacha sin i gcomhréir le treochtaí domhanda, agus beidh raon leathan tionchar acu seo ar Chontae na Gaillimhe.

Tá fís an Phlean i dtaca le hathrú aeráide i réimsí fuinnimh, na timpeallachta tógtha, iompair, an gheilleagair chiorclaigh agus talamhúsáide bunaithe ar ghníomhartha indibhidiúla, lena n-áirítear gealltanas ó Chomhairle Chontae na Gaillimhe a hastaíochtaí a laghdú faoi 51% faoi 2030.

Le cur i bhfeidhm an Phlean, tacófar le hinfheistíocht i bhfuinneamh in-athnuaite, leis an ngeilleagar ciorclach agus le hiompar inbhuanaithe, agus cruthófar deiseanna nua fostaíochta laistigh den chontae lena gcothófar fás eacnamaíoch agus rathúnas. Beidh comhbhuntáistí ann freisin, amhail slándáil fuinnimh mhéadaithe agus sláinte phoiblí fheabhsaithe agus tacófar leis an bhfís do chontae atá athléimneach ó thaobh na haeráide de, saibhir ó thaobh na bithéagsúlachta de agus inbhuanaithe ó thaobh an chomhshaoil de.

Sainaithnítear Oileáin Árann mar an Crios Dícharbónaithe (DZ) don Chontae. Limistéar roghnaithe é Crios Dícharbónaithe (DZ), ina n-oibríonn údaráis áitiúla agus pobail le chéile chun astaíochtaí a laghdú faoi 51% faoi 2030 agus an méid a fhoghlaimítear a roinnt le pobail eile.

Déanfaidh foireann thiomnaithe laistigh de Chomhairle Chontae na Gaillimhe monatóireacht ar an dul chun cinn a dhéanfar ar Phlean Gníomhaithe ar son na hAeráide 2024-2029 agus tuairisceoidh sí d'fhoireann bhainistíochta an Údaráis Áitiúil, Coiste um Beartais Straitéiseacha maidir le Gníomhú ar son na hAeráide agus Bithéagsúlacht, agus do Chomhaltaí tofa agus gheobhaidh sí treoir uathu.

Tá cóipeanna den Phlean ar fáil i mbrainsí Leabharlann Chontae na Gaillimhe agus ar líne ag www.galway.ie/ClimateAction.

An Ciste Pobail um Ghníomhú ar son na hAeráide

Sa chéad bhabhta maoinithe, tá €762,000 á chur ar fáil chun tacú le pobail chun dul i mbun bearta gníomhaithe ar son na haeráide. Dúnadh na hiarratais ag deireadh mhí Feabhra, agus fuair Comhairle Chontae na Gaillimhe 55 iarratas ó ghrúpaí a bhí ag lorg tacaíocht maoinithe do raon tionscadal, lena n-áirítear aisfheistiú foirgneamh, giniúint fuinnimh in-athnuaite, feabhsú bithéagsúlachta agus an geilleagar ciorclach.

Tá coiste meastóireachta neamhspleách Chomhairle Chontae na Gaillimhe ag scagadh agus ag déanamh meastóireacht ar na hiarratais tionscadail agus cuirfear an próiseas seo i gcrích go luath i mBealtaine 2024.

I ndiaidh an phróisis mheastóireachta áitiúil in CCG, cuirfear liosta de na tionscadail a mholtar faoi bhráid an Aire Comhshaoil, Aeráide agus Cumarsáide lena mbreithniú. Faoi láthair, an dáta a bhfuiltear ag súil leis le ceadú an Aire a fháil ná Lúnasa 2024 (d'fhéadfadh an amlíne seo le haghaidh ceadaithe a bheith faoi réir moilleanna nach bhfuil smacht ag CCG orthu).

Ar ceadú an Aire a fháil, eiseoidh CCG Litir Thairisceana chuig na grúpaí pobail rathúla ina leagfar amach na téarmaí agus coinníollacha ábhartha.

Agallamh le Denise Feeney re ciste gnímh aeráide Comhairle Contae na Gaillimhe ar Kinvara FM Satharn 25th Samhain, 2023 Mixcloud